Viloyatning nufuzli oliy ta’lim dargohi bo‘lgan Termiz davlat universitetiga tashrif buyurgan kishi mo‘jazgina shaharchaga kelgandek bo‘ladi. Chunki, universitetdagi talabalar soni qariyb 26 000 nafarga yetdi. So‘ngi yillarda universitet hududi kengayib, tobora ko`rkamlashib chiroy ochib bormoqda.
O‘zbekiston Respublikasi Prezidenti Sh.M.Mirziyoyev 2020 yil 20-aprel sanasida “Sanoat, qurilish va infratuzilma tarmoqlari korxonalarining to‘liq ishlashini ta’minlash masalalari” bo‘yicha o‘tkazgan videoselektor yig‘ilishida Termiz davlat universitetining byudjetdan tashqari mablag‘lari hisobidan Axborot texnologiyalari fakultetiga mo‘ljallangan zamonaviy bino qurish taklifi ma’qullangan va bu loyihani amalga oshirish bo‘yicha tegishli topshiriqlar berilgan edi. O‘zbekiston Respublikasi Vazirlar Mahkamasining 2020 yil 11-avgustdagi “Termiz davlat universiteti qoshida Axborot texnologiyalari fakultetining o‘quv binosini qurish to‘g‘risida”gi farmoyishiga asosan Termiz shahar A.Navoiy ko‘chasi 42-manzilida yangi bino qurish ishlariga start berildi.
Bino 7 qavatli bo‘lib, talabalar sig‘imi 1850 nafarni tashkil etadi. Shuning bilan birga 176 ta professor-o‘qituvchilar va ishchi xodimlar faoliyat olib borishi ko‘zda tutilgan. Binoda 51 ta o‘quv auditoriyalar, 8 ta komyuter xonasi, 1 ta kutubxona, 3 ta 100 nafar talabani sig‘dira oladigan ma’ruza zali, 1 ta kengash o‘tkaziladigan zal, 9 ta laboratoriya hamda ma’muriy (dekanat, kafedra va boshq.) xonalar mavjud.
Barcha kompyuterlar internet tarmog‘iga ulangan,Wi-fi zonalari tashkil qilingan. Har bir auditoriya zamonaviy smart doska bilan ta’minlangan. Talabalarning puxta bilim olishlari uchun barcha sharoitlar yaratilgan.
Yangi binoda Axborot texnologiyalari fakulteti, Fizika-matematika fakulteti va magistratura bosqichi talabalariga o‘quv mashg‘ulotlar olib boriladi.
Axborot texnologiyalar fakulteti 2020 yilda tashkil etilgan bo‘lib, ayni vaqtda 2 ta kafedrada 50 nafarga yaqin professor-o‘qituvchilar 1500 nafardan ortiq talabalarga tahsil berishmoqda. Fakultetda 4 nafar professor, 10 nafar falsafa (PhD) doktorlari faoliyat yuritishadi.
Bakalavr bosqichida 4 ta yo‘nalishda talabalar qabul qilinadi:
- Amaliy matematika va informatika
- Kompyuter tizimlari va dasturlash texnologiyasi
- Matematika va informatika
- Informatika o‘qitish metodikasi
Magistratura bosqichida 2 mutaxassislikda talabgorlar qabul qilinadi: Amaliy matematika; Kompyuter xizmatlari va ularning dasturiy ta’minoti (tarmoqlar bo‘yicha) Jami 100 nafardan oshiq magistrant tahsil oladi. Fakultetda 10 nafar doktorant ilmiy-tadqiqot ishlarini olib borishmoqda.
Fakultet binosining ochilish marosimida Oliy va o`rta maxsus ta`lim vaziri A.X.Toshqulov, Surxondaryo viloyati hokimi T.A.Bobolov, universitet jamoasi, faxriy ustozlar, madaniyat va san’at vakillari, talaba yoshlar , ommaviy axborot vositalari xodimlari hamda blogerlar ishtirok etishdi. Tadbirda so`zga chiqqanlar, mamlakatimizda ta’lim sohasida olib borilayotgan islohotlar, yaratilayotgan sharoitlar, barpo etilgan ushbu yangi o`quv binosi yoshlarning bilim olishlari yo‘lida qay darajada ahamiyatli ekanligini e’tirof etib o‘tishdi.
Ramziy lentalar kesilgandan so‘ng, talabalar uchun yaratilgan sharoitlar bilan yaqindan tanishildi. Kampus qurilishidagi zamonaviy ko‘rinish, puxta o‘ylangan arxitektura, go‘zal tabiat manzarasi, o‘quv jarayoni uchun yaratilgan qulayliklar ta’lim sifatini oshishiga xizmat qiladi.
