Jamiyatimiz taraqqiy etishida va davlatimiz ravnaqida o‘sib kelayotgan yosh avlodning jismoniy va ma’naviy barkamolligi, intellektual salohiyati muhim rol o’ynaydi. Termiz davlat universitetida tahsil olayotgan talabalarning bo‘sh vaqtlarini mazmunli va tizimli tashkil etish, mavjud klub va to‘garaklar faoliyatini samarali yo‘lga qo‘yish maqsadida turli loyihalar amalga oshirilmoqda.
Joriy yilning 31-may kuni TerDU Yoshlar Ittifoqi boshlang‘ich tashkiloti tashabbusi bilan talabalarning bo’sh vaqtlarini mazmunli o’tkazish, yoshlarning badiiy salohiyatlarini rivojlantirish, teatr, musiqa san’at, xalq an’analari hamda badiiy adabiyotga qiziqishlarini yanada oshirish, universitetimizda ta’lim olayotgan turli millat vakillari o’rtasida do’stlik aloqalarini yana mustahkamlash maqsadida “Talabalik bahori” festivali bo’lib o’tdi.
Tadbirni O‘quv ishlari bo‘yicha prorektor R.To‘rayev hamda Yoshlar masalalari va maʼnaviy-maʼrifiy ishlar boʻyicha birinchi prorektor O.Shofiyev ochib berib, o’z nutqida universitet talaba-yoshlari erishayotgan yutuqlarini alohida e’tirof etishdi.
Festivalda Afg‘oniston fuqarolarini o‘qitish ta’lim markazi direktori O.Ro‘ziyev hamda markaz talabalari mehmon sifatida ishtirok etishdi.
Festival davomida talabalar tomonidan “Xon atlas jilosi” milliy liboslar namoyishi, sport musobaqalari, “Kitobxonlik” tanlovi, “Quvnoqlar va zukkolar” jamoalarining chiqishlari namoyish etildi.
Zakovat intellektual o‘yini, velomarafon, “Yangi O‘zbekiston bunyodkorlari” nomli esselar, “Mening universitetim” nomli rasmlar tanlovi bo‘lib o‘tdi va bunda talabalar faol ishtirok etishdi. Ushbu tanlavlarda yuqori natijalarni egallagan talabalar 1-o'rin 1 mln so'm, 2-o'rin 800 ming so'm, 3-o'rin 600 ming so'm pul mukofoti bilan taqdirlanadi.
Shuningdek, oliygohimizda ilk bor "Qizlarjon klubi" ning ochilish marosimi bo'lib o'tdi. Fitnes klub, shaxmat-shashka, tikuvchilik va stol tennisi xonalari ham foydalanishga topshirildi.
