Talabalik hayotning eng qaynoq fasli, cheksiz orzu-umidlar davridir. Uning oʻzgacha sehri, jozibasi borki, umrning eng shirin dami sifatida yodimizda qoladi.
Joriy 2021/2022 oʻquv yilida ana shunday baxtiyor yoshlarning 1675 nafari Termiz davlat universitetining talabasi boʻlishdi. TerDUda yangi o’quv yili boshlanishiga bag’ishlangan tadbir bo’lib o’tdi va unda universitet rektori A.Maraximov Oʼzbekiston Respublikasi Davlat Mustaqilligining 30 yilligi hamda talabalikka qabul qilingan yoshlarni ushbu yutuqlari bilan samimiy qutladi. Termiz shahridagi 12-sonli mehribonlik uyi direktori D.Suvonova, tarix fanlari doktori, professor, “Mehnat shuhrati” ordeni sohibi S.Tursunov so’zga chiqib talabalarga o’zlarining iliq tilaklari va maslahatlarini berishdi.
Shundan so’ng talabalar vakillariga bilimlar kaliti, talabalik guvohnomasi hamda reyting daftarchasi topshirildi.
Tadbirda ota-onalar ham soʻzga chiqishib, oʻz farzandlari shu oliygohda tahsil olishidan baxtiyor ekanliklarini taʼkidlashdi. Yoshlarning bilim olishi, kasb-hunar egallashi uchun yaratilayotgan bunday shart-sharoitlar, koʻrsatilayotgan gʻamxoʻrliklar uchun Prezidentimizga, universitetimiz rahbariyatiga oʻz minnatdorchiliklarini bildirdilar.
