TerDUda “Nodir va noyob metallar kimyosi va texnologiyasi: bugungi holati, muammolari va istiqbollari” mavzusida Respublika ilmiy-amaliy konferensiya boʻlib oʻtmoqda
Termiz davlat universiteti Kimyo fakulteti tashabbusi bilan Kimyo fanlari doktori, professor Hasan Turabovich Sharipov xotirasiga bagʻishlangan “Nodir va noyob metallar kimyosi va texnologiyasi: bugungi holati, muammolari va istiqbollari” mavzusida Respublika ilmiy-amaliy konferensiya boʻlib oʻtmoqda.
Unda Oʻzbekiston Respublikasi fanlar akademiyasi akademigi Sh.S.Namazov, Oʻzbekiston Respublikasi fanlar akademiyasi akademigi S.S.Negmatov, t.f.d., prof. A.S.Xasanov, TerDU kimyo fakulteti dekani, k.f.d., prof. X.X.Toʻrayev, shuningdek, xorijiy universitetlardan jumladan, Qozogʻistondagi akademik A.Kuatbekov nomidagi xalqlar
doʻstligi universiteti t.f.d., prof. R.A.Tashkarayev., Moskva RTU MITXT universiteti k.f.d., prof. T.M.Buslayeva hamda Respublikamizdagi qator universitetlardan professor-oʻqituvchilar ishtirok etishdi.
Konferensiyada taʼkidlanganidek, kimyo fanlari doktori, professor, Xalqaro axborotlashtirish akademiyasi akademigi, Leybnis nomidagi Yevropa tabiiy fanlar akademiyasining akademigi Hasan Sharipov nafaqat Oʻzbekistonda, balki xorijda ham fizik kimyoning muhim boʻlimlaridan biri – kristallar kimyosi, kamyob va nodir metallarning noorganik va koordinatsion birikmalari spektrokimyosi boʻyicha ilmiy maktab asoschisi va taniqli olim sifatida tan olingan.
Shuningdek, kamyob va nodir metallar rudalari va texnogen chiqindilarni qayta ishlash uchun gidro- va pirometallurgiya jarayonlarining fizik-kimyoviy asosi boʻlgan kerakli xossalarga ega boʻlgan kimyoviy birikmalarning maqsadli sintezini bashorat qilish va amalga oshirish imkonini beruvchi tuzilish hamda kimyoviy xossalari oʻrtasidagi oʻzaro bogʻliqlikni oʻrnatishga muhim hissa qoʻshgan olimlardan biridir.
100 nafardan ortiq professorlar, ilm vakillari ishtirok etgan mazkur Respublika ilmiy-amaliy konferensiya kimyo sohasida yanada koʻproq amaliy tajribalar oʻtkazish, fanda yangiliklar yaratish, sohani rivojlantirish, qolaversa, yosh olimlar o’rtasida oʻzaro fikr almashish imkoniyatlarini kengaytiradi.
Konferensiya doirasidagi uchrashuvlar, ma’ruzalar davom etmoqda.
